دي قصة كانت في بنشات السي ار بوجود ود الفكي ورماح وليهم التحيه وان شاء الله تعجبكم..
دي القعدت قصادي ساكته ما بتتكلم..
خلت في القلب جرحا غريق ومعلم..
والخلى الفؤاد صابو السكون واتبلم..
الصابني منها كان صاب الحجر بتكلم..
............
ده الزول الجميل ياربيي جمل عيدو..
من لون الشمس ضاوي الخمار بي جيدو..
بس لو كان حلم ياربي تمو وعيدو..
بحلم بالجميل ايدي بتلامس ايدو..
..........
ياود الفكي شوف الجمال الباهي..
من تقعد حداك طوالي نلقاك ساهي..
ما يبقى الوصف قولا مزيف وباهي..
لو ختو الشمس لي نور شعاعا تضاهي..
.............
رماح الحبيب جرحو الاليم شاقيني..
من اقصى الوريد هداني طلع عيني..
الطب الحديث ان طب ما بشفيني..
عطشان بالفراق والمويه ما بترويني..
..........
يا رب العباد نار الفراق تطفيها..
من شوفة حبيب شاوي الحشا وكاويها..
المرق الرويح عينو البغرود فيها..
كان غمزت جزم الروح افتش ليها..
...............
مثلها في الجمال ما شفت واحده نظيرا..
طلقت في البنات نار الحسد والغيره..
اسود من سواد ليل البوادي ضفيرا..
ها البت من عسل والله ناقع زيرا..
..............
في عتمة ضفيرك النجوم زاننك..
من روعة بريق نور العيون زادنك..
يابت في الجمال والله ما لحقنك..
بهدلتي الرجال حتى البنات عشقنك..
.............
رماح العذاب باريتو ليل وليالي..
من فرقة حبيب دايما عزيز وغالي..
زي حال النجم فوق الافق متعالي..
خاويت السهر شفت العذاب بيلالي..
..............
ولالت في السما نجمة زحل محتارا..
تبكي من الاسف برق الحبيبه الزارا..
نورك في النجوم ولع مرارا ونارا..
ات ياك الشمس فوقا النجوم تتبارا..
..............
وشاحد للكريم يحفظ خطاها يزيدا..
والنظره القبيل يطراني بيها يعيدا..
وبس لو ما بقيت عقدا بلاعب جيدا..
شاحد الله الكريم يقلبني خاتم ايدا..
............
ودي اللاقتا في السي ار وقاعده حدايا..
في عينيها كانت الف ايه وايه..
من ضحكت جزم رفعت فوق الرايا..
جنيت بالفراق واصحابي جنو معايا..
................
وليكم مجددا تحيات قييييييييييييييصر (القيصر حمد)
الرئيسية 
