ناضميني في جواكي سر
ما تخافي مني ومن هواي
ما تخافي ذاتك تسمعك
ما تخافي إحساسك يتوه
ما بين ذهولك و دهشتي
والروعه تسرق ذاتا فيك
وانا ياني ذي كل الشيوخ
درويش بجر لعلوبه ساي
صلاي وذكار للنبي
ما كان بيحلم بالعشق
او مره في الخاطر يجيك
من ذاتو يمرق والدخول بستاذنك
لو مره يا بت يحتويك
تتلخبط الحاجات جواو
الني يشوفو كما النجيض
والعام يشوفو كما الغريق
دا الحب بلخبط في جواو
مع انو ما عارف الطريق
يا دوب بيحبى علي مشيك
تاتيتي فوق كل الدروب
الماشه لي عند السماء
وكل النجيمات والقمر
والواطه والليل والخلق
و الكون في ذاتو بيشتهيك
يا بنيه في قامه وطن
على قدر ما اتسع المجال بستاذنك
اسكن في داخلك دون رحيل
اطرب معاك ذي ما ادور
غنايه قبال اسمعك
صوتك بقول إنك هديل
عينييك ويكفيني الشكات
رغم انو وأجعني وبقول
عينيكي توب ابيض حرير
في نصو بقعه من السواد
وجمالا اجمل من جميل
حارساها عينيك برموش
كل ما يمر بيها النسيم
ترقص كما زعف الحرير
فتانه تكتل دون سبب
و انا قلبي كم صابو النزيف من طعنتا
والدم جرا في جواي نيل
خديكي لوزتين من قطن
شالن و دابن فتحن
و الكل بيشهد إنهن
يا روعه زي بدر السماء
و كتين تكون الدنيا ليل
و انا لسه ما وصفت شي
بس إلا وصفي الفيك فتر
وكتين شفاك طلن علي
فصين تقول من برتكان
اتلعثمت فيني الحروف
تمتمت في سري بكلام
وكتين ما شفت بياض بشع
ما بين افول شمس المغيب
و شعاع بطل من بسمتا
ناغمتا بكل الفرح
الكان معشعش فيني خوف
يا زوله ساكنه مع الشمس
مشطي راسك بالنجوم
دلدلتي شعرك بين شعاعك والقمر
لامن ظهر للناس خسوف
واتخيلــــــــــــــــــــي
حتى الخيال فيك إندهش
وإنهد حيلي من الذهول
اتنحنحت فيني الحروف
قايلاني بقدر اكتبك
حاورتا بكل اللغات
ما سبت شي
حتى العيون حاورتهن
وفهمت منن كم حرف
إنك ماي
عشقي وهواي
فرحي و بكاي
ذادي و هناي
اختي وكمان اكتر كتير
بلقاك معاي في كل شي
يا زوله في قامه وطن