بدون ميعاد
لاقيته في الخاطر
إيمكن بدون ميعاد
راحله و دموعه الليل
بتوصي كم نجمات
لو جيتا بالصدفه
ما تبكي بالدمعات
لابد تمد الايد
وتقالد الضحكات
لا تنسى يوم باكر
قبل الشمس تطلع
ادعيلي في الصلوات
هسع هي راحله الليل
دايراله منك ذاد
للسكه و المشوار
كل ما الشمس تنزل
تال الغرب بهناك
صنقع على النجمه
حجيها يا المريود
عن قصه الشاطر
وبنيتو السمحه
عن الحكاوي عموم
عن بيتنا والحله
حاج احمد الميرود
ود الفكي السافر
عن لمه الشفع
تحت الشديره نهار
دايرين يلاعبو الضل
ذانقنو بالبصله
و الضل ضحك مبسوط
شان فرحه الشفع
وضحكته برضك زين
شان كنتي في جواي
رغم انو ما شايفك
إلا السؤال الكان
جواكي ليهو سنين
وانا هسي زي نعسان
حلامان وما واعي
باكر بترجعي صح ؟
زي زحمه الشفع
ساعه شراب الشاي
انا غايتو راجي الشاي
راجيكي ترجعي لي
شان نطلع الشارع
نلعب زمن بالطين
راجيك في الخاطر
إيمكن بدون ميعاد
راجيك ومستني
حلم السنين الفات
يرجع معاك راجيك
راجيكي في الخاطر
كلمات
محمد يونس محمد احمد ( ود كبير )