باكر بجيك

باكر بجيك
غناء الفنان عبد الرحيم ارقي

باكر بجيك قاطع مسافات العشم
شايل معاي هوى العيون
آمالي في أجمل نغم
باكر بجيك قاطع مسافات العشم

بجيك من سكـــة القلب العشق ذاتك سنين
بجيك من صفحة الماضي الكان قاسي وضنين
خايف يكون زيف المدن غير أصالتك والحنين
جايك من ليل العـذاب ارجيني بالصبح المبين

فُتيني للليل الطــويل يرميني في حضن الآلم
سبتيني بين شبح الظنون وأحزان بتنبع من وهم
ارجيني فوق أرض الصبر جايك من زمناً سجم
لا فيهو للأفــراح طريق ولا فيهو للأيام طعم

باكر بجيك بي لعنة الريد المـــــلك قلبي الجريح
بي حال بيغني عن السؤال ما بوصفو الخاطر الفصيح
خايف يقصر بي العمــــر تحملني من الدنيا ريح
لو كان مُقدر إني اروح سوي لي في روحك ضريح


سافرتي مـــا خليتي خيط ابراه للمرسى الجديد
سافرتي مـــا خليتي لي غير ذكرة الزمن البعيد
علمتي روحي الإنشراح علمتي قلبي يحــب شديد
فجاءة اختفيتي من الدروب وأخفيتي كل زمني السعيد


لكني لي أحســـاس يسوق خطواتي لأجمل عيون
باكر بتلقي خطاي معــاك تتمشى ما بين الغصون
ما تقولي لي وصلت كيف مــن دل قلبك يا حنون
أنا قلبي أصبح ليك مكان يا الناسية إني انا ليك كون

باكر بنكشف الضباب القـــاك في فرح الشباب
تقشي في دمع الفـــراق وتزيلي في أثر العذاب
بكرة المسافـات تجتمع وتلم قلوب يوم عيدها آب
ويعود شباب الفي هواك يا حلوة بي أحزانو شاب.

لقيتك

لقيتك في زمن قاسي كتمتك جوا انفاسي
دموع عيني البقت لي سبب باديك مسحتيها
مسحتي تعب زمن قاسي
بخاف بعد القليب يرتاح اخيب فيكي احساسي

لقيتك في ضي القمرا تفتشي في الرمال ابرة
تفتشي عن جرح ينزف غريق جواها كان يبرا
وعن حزمة حزن مزرودة في درب الحلق عبرة
لقيتك مسارب الروح محكرة في ضلوع صدزي
توقعي في قرار لحنك مع دقات طبول قلبي
نغم من المساحة الفيهو ما لحقنو انفاسي

لقيتك انت تشبهي لي حروف في قصائدي مكتوبة
تناتق فى طرف كلمة تقول باالله مغلوبة
كان دعواتها وقعت في سبحه فيها لالوبة
تجرو دعاها للبكفيها والبكفيني شر الهم
ومن شر جنتي وناسي

لقيتك في هديل قمرية دعكت عينا يا دوبا
صحتها نسمة دغشا بدري قومي ادخري للحوبة
طارت ليها في راس تمره نقرت ليها شخلوبة
وراها قبيلة من الطير تقول دقولو فى النوبة
اريتك كنت جيبتيها ودقيتيها نوبة تقيلة
ادور فيها زي درويش واعشق فى المديح ازكار
تخدر جسمي لي راسي

لقيتك في عيون طفلة بتلعب جوا راكوبة
بريئة تمص اصابعينا تدق في حلة مقلوبة
وتدعك في طرف عينا البتدمع من برد طوبة
تدفر في التراب بهم تكورك يمة حبوبة
محمد وين وفاطمة السمحة صح الليلة ما جايين
تكورك ليها حبوبة أي حبيبتي ما بيجو
عشان الليلة ما في حجو
لكن بكرة يبقى يجو مع آخر مريكب يقاتل فيها رواسي
مشتاق وجاي بين موجات يقاتل فيها رواسي

لقيتك زي صباح الخير لما تقولها لي خالتي
ترد روحي المشعتفة يوت تجم اعصابي كان فالتي
تبق نار الفرح جواي زي ما كان زمان حالتي
وامرق في دروب حلتنا جادع في الكتف شالتي
في يوم الثلاثاء قجر اقعد في قفا الخلوة
واعاين تالا مروي هناك في الدرب التحت
راجيلي حاجة تسوقني تنقاسي

لقيتك انت في احساس مسافر ما بينوم الليل وخايف من شمس بكرة
وخايف من دموع فضاحة عارفة ماها منسترة
راقد بين حبال اشميق مقلعة بدري من تمرة
وسارح في صحاري الهم بين بوحات وخور جبرة
فجأة آذان خواه ناداه حي علي الوداع يا باكي لا تبرا البكا وتسرح
دا البياح خلاص روح واخافك ما تبل شوقك
تروح والسفر قاسي

لقيتك انت لا صدفة ولا عارف مواعيدك
عقدت لسانى بالدهشة وهجرتي قليبي بايديك
سرقني شعوري باللحظة
رموشك عينيك يغطي كأنها ضل من الماضي
سألتك بالذي سواكي كيف وصلن خطاويك لي
منو الوراك اني حزين حكالك بالضياع البي
منو الاداك ملامحي انا وما شفتك قبل القاك الا بعد ظهرت علي
بلا اذن القدر جابك ولا فاهم سبب جيتك
اكلم نفسي مني ولي واجمع في الخيوط واقول
كانو انا امي كان ناذراك تطلعي لي من الجوف
وتنزعي عن دواخلي الخوف
تطيري مني هلواسي