الرد
اب عاج في سماو ماف زول بناقرو يهشو
وإن غاب بالسنين ماف طير بيقرب عشو
إلا الليله تب جنيات دبيرق خشو
نتف الريش وجب شان الكبار يتهرشو
* * * * * *
والزول إن هبش ما اظن بهابش عقرب
لا بتشفيهو نار لا حبه كي لا محرب
ناقرتي اب سموم شايف عصيرك مغرب
جيتك زول قصاص مليان غبينه مكهرب
* * * * * *
ومحظوظه ام قديم وقعت بدون ما تسمي
مي خابره الاسود بتخاف تعكر دمي
خابراني العريب إن قلت سو فوق نمي
مابركز معاي إلا الكبير ود عمي
* * * * * *
و الشين والعوج قولن بشنن حالي
والرد للحريم ما من طبيعتي وبالي
اسالي في الرجال الضاق هجيري وناري
بحلفلك يمين انا ود كبير العالي
* * * * * *
وحامد للكريم جدي الكبير بحراني
وإن داير اقول جن الكلام ببراني
همباتي وقسم فارس العواس بطراني
جريت اب كداد زيك ولا برجاني
* * * * * *
ويا القلت ود مطر طالعني خابر صي
ما بلدن وراي او حت يجيبن زي
ميرود السنين بنصح يمين بي كي
يا شبه الرجال ما تقولي صحبي وخي
* * * * * *
والمطر البشيل من فوق سماك داورني
برق في الصعيد ساعه النزول شاورني
دودا وجاط خلاي عقبا نزل جاورني
قولك ود مطر فوق الكبير عاورني
* * * * * *
وقولك ود مطر لملم عجاجي وقامبو
كتاحه وسموم فوق الخلايق حامبو
قانصلك يمين زي ماقنصت لي رامبو
وإن داير عفوي يعفي البشير اوكامبو
* * * * * *
وشايفك آوليد باريت دروبا قاسيه
والشوك واللهيب ما بطاطا رجلاً حافيه
الشافع إن مرض شمالو حته عافيه
مابرجع يكوس فوق الدروب الناصيه
* * * * * *
والخيل والدواس في العكه ما بتجارن
والفحل النتر لي خيو ما بتحارن
ضاربت الكلاب شفت الاسود اضارن
معروف ما بخاف حتى الرصين إن طارن
* * * * * *
وخابراني الجبال شقاق دروبا وليله
من زمن الجهل ياني البعوم فوق سيله
خاويت الحجار قاسم همومه وشيله
وإن مالت جبال ياني البعدل الميله
* * * * * *
ويا القلت ود مطر اختاني فوت لغادي
إن درت الدواس حرم بقرشك عادي
الزيك هوان ما بوقفهو قصادي
معروف زول طرح وانا ليك تب مو فاضي
* * * * * *
وحرم ود كبير وكبير عليك بي راسي
جزاز الرقاب وكتين ادقو نحاسي
إن درت الهظار صحبي واخوي من ناسي
وإن درت العوج حرم تخبرو دواسي