منتديات بيت الضل الثقافية

منتدى ثقافي يتبع لجمعية بيت الضل الثقافية ( معاَ من أجل ممارسة ثقافية سليمة )
 
الرئيسيةالرئيسية  البوابةالبوابة  اليوميةاليومية  س .و .جس .و .ج  بحـثبحـث  الأعضاءالأعضاء  المجموعاتالمجموعات  التسجيلالتسجيل  دخول  
بحـث
 
 

نتائج البحث
 
Rechercher بحث متقدم
المواضيع الأخيرة
» قصة تتطفل الميكانيكي على قسم مدنية
الإثنين مارس 18, 2013 1:49 pm من طرف Velver

»  فرحة رجوع
الخميس أغسطس 09, 2012 9:19 am من طرف matadoor1991

» قصه بدون عنوان
الثلاثاء أبريل 24, 2012 4:40 pm من طرف محمد عبد الله عباس (حنفي)

» **بحر العشق**
الثلاثاء أبريل 24, 2012 3:59 pm من طرف محمد عبد الله عباس (حنفي)

» ناامت (كااملة)
السبت أبريل 07, 2012 5:30 am من طرف محمد عبد الله عباس (حنفي)

» ماداير عرس
الأربعاء نوفمبر 23, 2011 3:25 am من طرف الدمنهوري

» حكم العقل
الجمعة سبتمبر 23, 2011 2:58 am من طرف الجنرال

» بيت شعر لمن تهديه
الأربعاء مايو 04, 2011 3:19 am من طرف الدمنهوري

» ***ناامت***
الإثنين مايو 02, 2011 12:22 pm من طرف بكري الامين

ازرار التصفُّح
 البوابة
 الرئيسية
 قائمة الاعضاء
 البيانات الشخصية
 س .و .ج
 بحـث
منتدى
التبادل الاعلاني
احداث منتدى مجاني
المتواجدون الآن ؟
ككل هناك 1 عُضو حالياً في هذا المنتدى :: 0 عضو مُسجل, 0 عُضو مُختفي و 1 زائر

لا أحد

أكبر عدد للأعضاء المتواجدين في هذا المنتدى في نفس الوقت كان 17 بتاريخ السبت أغسطس 31, 2013 12:35 pm

شاطر | 
 

 قصة طه و وددكين

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
ود شندي

avatar

عدد المساهمات : 16
تاريخ التسجيل : 29/06/2010
العمر : 29

مُساهمةموضوع: قصة طه و وددكين   الإثنين سبتمبر 27, 2010 6:41 am

[b]بسم الله الرحمن الرحيم


تروي الرويات أن هذه الواقعة وقعت حوالي عام 1818م وكانت الواقعة الشهرية بقتل أحد فرسان البطاحين (طه) ، حمد ودكين زعيم الشكرية واحتمي بالمك نمر وكادت الحرب أن تقع بينهم لكنها انتهت بالصلح .. صور مشاهد هذه الأحداث الشاعر الكبير أبراهيم العبادي
سوف انشرها لاعجابي الشديد بها عسها ن تنال اعجابكم
قال طه :
أخوك يا ريا وكت الخيول بدبكن
أخوك يا ريا وكت الرماح يتشبكن
اخوك جبل الثبات وكت القواسي بحبكن
كم بكيت وكمقشيت دموع الببكن

ريا
وراك اسود علي ما نمت اسع طيب

طه
بسم الله قولي اخو طيب طيب
نصيح وشديد حاضر قلبي ماهو مغيب
إلا الشفتو في النوم من هوايله يشيب
الزول في الصحي مخدوم عليه شقاهو
وإن غمض شويه تجي الهموم لاحقاهو
الصف ابلبوس انا ما بخافو لقاهو
ياليت الحلم في صحيا كان بلقاهو

قالت ريا
كعب نوم النهار أمس العصير كنت نايمه
رأيت قدام الفريقنا أشوف صقوراً حايمه
كبيرن غار علي من نومي تبيت قايمه
صحيت مهجومه لا مفصل ولا في القايمه

طه :
وانتي كمان رأيتي صقور عباره غريبه
علامتا كافية ظنيت الحكايه قريبه
هاك مني الصحيح الما بتدخلو الريبه
هادي الحله بي عيني أشوف تخريبه

ريا
تف الشينه ليه فاجعني ليه يا طه
انت الدغري وانت الكاشفه ياك غطاها
كان الدنيا هادي العقبة تتخطاها
ما بضلل سماها وما ابتشيلني وطاها

وقعدت ريا تبكي رد عليها طه وقال
ما بفيد البكاء وكلامي احسن تنسي

قالت ليه ريا
كيف ما ابكي وكيف افوت مراتع انسي
افقد كل شي عزي ورجالي وانسي
تطلق فوقي نار عقبان تقول لي انسي

قال طه : فال الخير أخير ما شفنا شيناً جدت
كلا لشفنا أحلام في طريقه إتعدت
قبل الليلة إيد لحمان قطْ ما اتمدت
ما بنهد شرفنا لو السماء إنهدت

قالت ريا : خير إنشاء الله خير والخير مساك وصباحك
والفال السمح فالك يضوي مراحك
بالضيفان أشوف عامر تملي مراحك
شينك ما أشوف وأشوف هناك و أفراحك

قال طه : خير الزول يقول مهما الامر يتهول
قالوا الناس علي فالو الحلم يتأول
غاية الحي فناه إن كان قرب إن طول
يترك ذكرو والناس الوري بتتقول
قالت ريا : وريني الحلم التورك مزهول

قال طه : أصبري لي أروق حبل الفكرمبهول
احكيلك شنو الشفتو والله مهول
شفت الوحده شفت النار وشفت الهول
أحكيلك تمام الشفتو ما بتغابه
جايين العصير أنا وإنتي من الغابه
سايقه ليك بهم قدامي بي رقابه
بينا والفريق إتولعت تقابه
قدر ما نشوف قدامنا نلقي حريق
وقت النار علت ما شفنا تاني فريق
باصرنا المروق ما لقينا لينا طريق
تشكي من عطش واخوك يابس ريق
فترتي قعدتي ,انا محتار جلست وراكى
حاقبه الدرقة ختيت سيفي فوق أوراكى
وكت بعد البهم لى قسعو قمتى براكى
غسعتي وجيتي ومعاك كور صقور تبراكى
تبت بي عجل شافنى جفلن و طارن
غابن من عيوني وفي اللعوت اتضارن
ما غابن كتير جن يقدلن يتبارن
قدامن كبيرن عينني وغارن
سل السيف ولاقاهن أخوك يالضامره
تور عنز أم هشيم الفي المجامع دامره
سيل تلوى اندفق فوقو السحائب هامره
حجر الصاقعه فرتاك الصفوف العامره
بادرني الكبير ديك إستعدن وقفن
ما مهلتو طار راسو وجناحي يرفن
طارن ديك وقت بي ريشو رقد اتكفن

قالت له ريا : عارض ومات خلاص لي الليلة يمكن عفن

فبعد ان بداء طه يطمئن ريا اراد ان يقطع الشكوك والمخاوف من تحقق هذا الحلم بالزواج من بنت عمه ريا فقال
نحمد ربنا الليلة مات عارِضنا
وان كان عمروا طال يا ريا كان قارضنا
يلحقوا بي عجل ديش همنا المارضنا
نبدا زواجنا بكرة منو البيجي يعارضنا
بطال البعيش في الدنيا اصلوا غناه
ان كان مالو راح غير اهله مين يدناه
سمح لبفوق اساس ابواتو تمه بناه
والزول دون قبيله غناه شن معناه
ما بنفرح بي مال ونقول كفانا ورثنا
نفخر بالرجال في الحارة يبقوا ترسنا
نجمع ناسنا هيلنا من الكبار حارسنا
يحضروا اهلنا فرحانين يباركوا عرسنا
كل بطحاني يفرح بي عرسنا مناه
ساعة جمعتن بيتنا يتم بناه
عذاب عيش العزب يا ريا مر ضضقناه
سمح الزول صبي يد ويربي جناه

طبعاً ريا ما قبلت الكلام ده لانو ابوها عبد الله المعروف بابو كبس ما تم سنه من وفاته والناس في حالة حداد فقالت
ده الاعوج تراه ووالشين نهايه حدو
إن شاع ده الخبر يملا الفريق لي حدوا
يقولوا ابكبس من دخل ود احدو
فرحوا وعرسو لا موجعن لا حدو
إن كان في الفريق ماتت مريه ذليله
لي الحول يرفعوا العرس الدخاتوا الليله
خليه ابكبس راجل الرجال ودليله
إن كان بي قبيلة تعدوا تبقي قليلة
خليه الكلام وعرسنا في ده الحال
من بالك أمرقو محال والف محال
علي ميتت ابوي لي الليله حول ما حال
نصبح بكره ونسه وبهادل حال

رد عليها طه وقال ليها
الموت ما شمت غاية البخود والببروا
والموت والحزن ما جابو زول من قبرو
الزول في الشدايد أولي يلزم صبروا
يترجي الكريم مولاه كسره يجبروا
بنخاتر منو الوجعه هيلنا برانا
نحن أهل المصاب والناس عزا مجابرانا
في أخر المراح دايماً تجي الفترانا
عادة الحد ندوس والناس عقب تبرانا

بعدين ريا شافت تحسم موضوع العرس ده مع طه وانه لازم يتم السنة كالعادة المتعارف عليها في الحداد

فقالت
الناس بالمكارم والفعال بتباهو
زي الفطرة ينشا الزول حسب مرباهو
عداة جدو عادتو ونحل ابوه نباهو
يلبس ثوب قبيلته ان داره ولا اباهو
من الليلة حول مضيوه تاني اتكلم
الدايروا بيتم رب العباد ان سلم

رد عليها طه
تاني امضي حول وانا بالحسا اتالم
علي حكمك صعب انا قابله ما بظلم
نستني السنة قاسية وصعيبه علينا

ردت عليه ريا
تم الاتفاق من الكلام خلينا
زي عادة البلد لا زدنا لا قلينا
إن شاء الله السنة بي خيرة عايده علينا
يا طه البهم قرب رجوع سراحو
بنات واولاد ديك ناس فريقنا الراحو
نصيحة سمعتها من الكبار الراحو
قالو العربي ما بنعز كان ما مراحو

وتقوم ريا فايته علي الفريق وطه يعاين فيها وهي ماشه ويقول
ياليت السعادة ان كان وقت ايديه
كنت اعيش غني في الدنيا بالزنديه
علي حكموا ناسي الفي اخذوا الديه
اموت بالعطش والمويه بين ايديا
اه يا رب ارحم صبري امس ضنين
يمحق ديه السنه ربي الحليم وحنين
يخصمه من حياتي رضيت بعشرة سنين

وهنا ريا داخله علي الفريق لاقوها خمسة عرب راكبين زواملم " وديه بداية الحلم الشافتوا ريا وشافوا طه " العرب قربوا من ريا قام واحد من العربان المع ود دكين شيخ العرب نادي ريا وقال
بالضيفان تمري لا سلام لا كلام
صدقوا اهل المثل توب العرب صح لام

قامت ريا ردت عليه
حبابكم عشرة ومن دون كشرة والف سلام
يا وجوه العرب المتلي ما بتلام
انا بت الرجال اهل الدرق والسيف
بت الما بهموا بي حساب الخريف والصيف
بت البحجو لى المرقوب بكرموا الضيف
انا ريا كان شفتكم افوتك كيف

قام العربي قال ليها
من وين في الاهل كفاك فخر يا بنية
ردت عليه ريا
انا بت البيوت المن بعيد معنيه
بى فوق السما نفوسنا وبيوتنا حنيه
انا بت ابكبس في النسبه بطحانيه

قام رد عليها ود دكين طبعاً عرفها انها هي زولتوا العاوز يعرس زاته فقال
عبد الله ابكبس عز البطانه وفخري
في راس العرب بنعد ماهو الوخري
كريم وهميم كان للقبائل دخري
بت شيخ العرب هيلك صحيح تفتخري
توقد ناره ديمه الما بكوس الجمره
وفي الضيفان يهوش سكينو دايماً حمره
بي كاس ما عبر لبنو بيجيك بالعمره
هيلو الشكرة هيلو الرئاسه هيلو الامره
المرحوم ابوك كان للقبيله غطاها
عزك قديم عمك حسين ابو طه
ان شاء الله اخوك دي السكه ما تخطاها
بقصد بيها ود عمها طه يعني هل هو في مكانه ابواتوا

فردت عليه ريا قايله
كما يسد مكانن قدموا ليش يوطاها ( يعني ماشي في الواطه ليشنو غير اكرام الضيف واغاثة الملهوف )
لا يفوت ولا يموت الساحتو يوت مغشيه
تقابة الفريق يوقد صباح وعشيه
زايد في الرجال طالق قفاي و وشيه

رد عليها و دكين
ما دخل التراب البركه في الذريه
والخلاك وراه ما بقولوا مات يا ريه
دايما في القبائل سيرة ابوك مطريه
بيكي وبي اخوك تزيد وديه المطريه

قام واحد من العرب داير يعرفا انه ده شيخ العرب ود دكين فقال :
ما بتسألي لامن وين ولا وين ترسو

قالتلوا ريا
كيف العربي يسأل ضيفو كيفن تنسوا
أول بكرموا ويخابروا ساعة أنسو
من مقلب حديث يعرف أبوه وجنسوا

فرد عليه العربي
عملتي حسابو ضيفك وكرموا وجبتيه
يخجل كان سألتي وإسمو ما عرفتيهو
إسم شيخ العرب سامعابو ما شفتيه
ده خريف البطانه المالوا فيها مشارك
هيلوا السارحه هيلوا الصاهله هيلوا البارك
ما وقع لك كلامي ساكته لي شنو خبارك
فخرك ود دكين جاك في فريقك زارك

ردت عليه ريا
اهلا حبابو العزو ماهو لفايه
اب ناراً تولع للضيوف دفايه
بي شيخ العرب الإفتخار ما كفايه
تابعو إنت جانا نجري ونخدموا حفايه

رد عليها ود دكين
بارك ربي فيك عقلك يدوم يا ريا
كرمك ماهو كلفه ديه طبعتك فطريه
إياك بت التلوب والسمته فيك محريه
قديم فوت البطاحين عزه للشكريه

في الوقت داك جاء طه ووجدتهم واقفين فقال :
مرحبتين حباب مرحب خريفنا الزارنا
حباب شيخ العرب اتشرفنبوا ديارنا
حباب راس العرب البيهو كل مدرنا
تنزلوا في الدرب مالنا ماتت نارنا

رد عليه شيخ العرب
حباب طه الضرس والفي الصهيباب راس
الجود والكرم يلك قديم ميراس
نارك ما بتموت با ولده الفراس
قاصدين ام شديد ومعانا عوجه راس

رد عليه طه
لعدوك العوج يا الفي الكبس سراي
راسك ما بدوس مليان رجاله وراي
باكر لي ام شديد اركب معاك براي
يا شيخ العرب لاكن تختوا كراى
طبعاً شيخ العرب ما فهم كلمة كراى ديه فقال لي طه ..............
هادي الشورة يا طه الغلبني دليله
كل البزمه القاهو فيك قليله

رد عليه طه شارح ليه كلمة كراي
كراي الدايروا تبقوا ضيوفنا انتو الليلة
ترقدوا في الفريق حتي ان عشانا بليله

رد عليه ود دكين
مسكنا الدرب أسرع قوام ما تلعب
دارك ديمه عامره والسمح ما بكعب
يكفين الوصف لاتشد جمل لا تتعب
وهدنا الطريق عقب الوصول ما بصعب

رد عليه طه
يمين تغشوا الفريق بتفوتوا نحنا مقابر

رد عليه شيخ العرب
عامر انشاء الله ديمه اياك مرسى العابر
مشطوطين خلاص مسكنا في دريب جابر
نخاف عوج الطريق منو لي المقدر خابر

رد عليه طه
دريب جابر مزم والسكه سالكه ورايقه
فرقان ما بتلاقيك ما بتعوقك عايقه
اخذ خاترنا نحنا قالوا واصله السايقه
بتراوح ام شديد باكر زواملك فايقه

رد عليه ود دكين
الزول ان وعد شين ميعادو يخلفو
في ربط اللسان يسخابو دمو يتلفو
سفري الليله فيه زولين ما بختلفو
ضروري اصل ام شديده علي وعد بي حلفو
ما بعرف ازوق من نشيت تبيت
فريقكم لي فريق وبيتكم يمين لي بيت
اجيك ديناً علي حتي إن بقيت حبيت
هاك وعداُ نجيض ارجانا بكره مبيت
شوفتي للفريق ايام بكي ابواتك
ما غابني حالك سمعت بي نخواتك
فريقك بكره ضيفوا وما بفوتوا وحاتك
إلا أحققك وبراي اشوف نفحاتك
يا ود الهميم النفسوا ما معارضاه
كرم الضيف عليك مكانه ابوك فارضاه
جاييك في امر ان تابه وان ترضاه
غيرك ما بكوس واملي بس تقضاه

رد عليه طه
غرضك مقضي كان احتاج لخيل وجمال
والضان والابل سارح يمين وشمال

ردعليه ود دكين
فوق القولتو انا لي فيك امال

رد عليه طه
بي دمي الغرض اقضاهو خلي المال

المهم طه زي فهم شيخ العرب وده ماشيلوا جاي وطه ماشيلوا علي المال

فرد عليه شيخ العرب
دي المأموله فيك وين الدرب خترنا

رد عليه طه
دربكم في السلم

قا شيخ العرب
والله تب ما ودرنا
بكره نجيك ان قلينا ولا كترنا

وهنا ودعهم شيخ العرب وسار بي جماعته قاصد ام شديد وعلي اساس في اليوم التاني ينزل ضيف علي طه وقبيلة البطاحين

وفي اليوم التالي طلع طه مع ريا منتظرين ود دكين حسب موعده معاهم وفي الحديث قال لي ريا
في البال لي ضمير شيخ العرب متعوب
قايم نفسه يختف في الكلام مرعوب
ما خاتيلوا شئ ما شوفتي كيف مرعوب
حمد ود دكين مرتع دياروا وربعوا
ده الشئ السمعتوا من الاباه والتبعو
الراجل فاعيلوا يبين لك طبعوا
انا ود الخلا البعرف اسوده وضبعو
ردت عليه ريا
اعوج كان يخلف الليله ميعاد جيتو
رجال وحريم كل اهل الفريق في رجيتو
قطعوا السارحه كل زول في مراحو سعيتو
كبار وصغار و حتي الراعي خله رعيتو

قال ليها طه
محال يخلف محال قال جايبو غرضاً عندي

ردت عليه ريا
كــان غـــــــــــــرضاُ صـــــــــــعــــــــب ؟؟؟؟؟

رد عليها طه
كان رأس نمر في شندي
وعدتوا أقضاه وابذل كل جهدي العندي
كان بالمال وكان بالراى وكان بي زندي

قالت ريا :
هيلك من زمان غنت البجيك تحجالوا
لاكين ود دكين عامر قديم برجالو

قال ليها طه :
يا ريا الكلام ده اخير تقفلي مجالو
وكت اوعدته بقضالو غرضو الجالو

وفي وقفه طه وريا يجوهم ثلاثه من ابناء البطاحين عبدالله وخلف الله واحمد قال عبد الله : سلام يا طه

قال طه :
مرحب بي كبار قبيلتي وعزي
مرحب بالاسود البفقعوا المستهزي
ريا جات قبيلتك فوقه انكعى هزي
وإن زحينا يوم الحارة قرنك جزي

ردت عليه ريا :
اولاد بطحان تعيشوا ويزيد مراحكم ناير
وناركم في سرات الوادي تهدي الحاير
بتحلو المضيق وتصدوا غارات الغاير
ما هيلم تزحوا غن كان يزح الداير

قام خلف الله لما سمع الكلام ده خاف وارتجف واصابته خوفه كده

فناداه عبدالله قال
خلف الله ولدي اقعد قبال ود عمك
كلام ريا هادا بشوفه غير دمك
من زمن بعيد أتمني أسمع نمك
فرج همنا مولاي يفرج همك
دوبينا ......قول ... دوبينا

قال خلف الله
الولد البخاف من القبيلة تلومو
بخلف ساقوا فوق تيساً رقيق قدوموا
اما يجيب رضوه البهم البينقر فومو
وإما تخامشن قدح الرماد حرومو
سنابك حضر الطافه و جرايدك نوا
كورك سال و مزيقا و رطانه و عوا
الخلاني فوق نار أم لهيب أتلوي
النوم شفتو يا قرد القلوع شن سوا
أكل الشلخه لامن كمل المنسية
شمخ الحورى لبعصه عريب بت ريه
أكان ما أسكت الباكيات و أخلف الكيه
قوله أبو فاطنه يا الصادق خساره عليا
خرير دوماتو فوق عاجن رسن متلاقيه
يا الغول النقيب سويلو سوق الساقيه
بت معز الخلا الفوق الكجر متاقيه
عكرناها يا أمروبه النشوف الباقيه

وبعدين ظهر ود دكين في جماعته جايين علي الفريق
فقال طه :
هداك ود دكين بي زمله بان شفناه
دار اليوم يروح خلف الوعد خفناه
الراجل في الاصول ما خاتي لي معناه
يا ريه استعدي الزول جمعنا عناه

ولما وصلوهم ود دكين قال
ولاد بطحان سلام اهل النبا و الشكره
سلام عز العرب اهل الفحل والبكره
سلام يا طه يا راس الكرم والضكره
جيت لي غرضي يا طيب الاصل والذكره

رد عليه طه
مرحبتين حباب مرحب خريف الرازه
حباب شيخ العرب البيه القبائل عازه
حباب سيف العرب البيه هاشه وهازه
في يمنك قبيلتاً ما تقبل فازه

قام عبد الله قال : هيا جايهو الزمل

رد شيخ العرب
خليه يا عبد الله
غرضي إن كان ما أنقضى أنا زملي ما بتدله

رد عيه طه
الناس في رجاك من الصباح في مله
كدي شوف الطعام شيخ العرب بسم الله

رد شيخ العرب
ما باكل طعام كان ما حساب اتضرب
وقضيان الغرض فيكم حقيقه مجرب
الامر العنيتو كما اتدرب
ما بنفعني اكل وما بيرويني مهما اشرب
كانت العرب لا تمتنع عن تناول طعام قوم الا لوقع امر جلل وامر هام فيحاول اهل الدار واهل القبيله تلبيه ذلك الامر مهما كلف ومهما كان ثمينا
فقام عبدالله وقال
ياشيخ العرب امرك خلاص همانا
قول غرضك عديل خصصنا او عمانا
عسع نقضى ليك في محلنا اللمانا
كان بي مالنا كان بي دمانا

رد ود دكين " شيخ العرب "
عندكم الغرض لا بدور قلم لا ورقه
ماغرضاً تسافرو لو وتقيسوا الفرقه
يقضي ان قولتوا خير مابدورلو سيف لا درقه
وان قلتوا لا يروح شمار في مرقه
ما مقبوض وجيتكم لاجي فوقي جنيه
بي خيري ومراحي وتاني نفسي غنيه
جاييكم نسيب تدوني بطحانيه

رد عليه عبدالله
خير سميـــــــــــــــــــــــــــــــها

ود دكين
في بت ابكبس لي نيه

قام عبد الله رد عليه
يفتخروا البطاحين ساحتم راحبالك
لكن ريا امرها مقضي من قبالك
فات فيها الفوات لي طه هاد قبالك
من دون ريا قول الدايروا في بالك

ده فريق الصهيباب مافيهو واحده حقيره
مال ورجال وعز في الحله مافي فقيره
كثير الزي ريا مليان البلد من غيره
ان درت الضغار وان كان قصدت صغيره

قام شيخ العرب قال
إن مال الشجر ما بكسرن فراعو
وقمحان الطلب لي المابجيبه ضراعو
ليه يا أهلنا البيناتنا ما بتراعوا
القال راسي موجوعني يربطولوا كراعو


قام عبد الله قال
حبل المهله يربط انت ارتاح بيت
بكره نمر سوي ونلفي البيوت بيت بيت
سمي الدايره ولوم البقولك ابيت
رد عليه شيخ العرب
يمين بالله غير الغايه مالي مبيت


هنا طه حز الكلام في نفسه لانه شيخ العرب بينوا ليه انه ريا مخطوبه وبعد ده هو بصر وبجادل فقام طه وقف وقال

يا شيخ العرب أمرك بشوفو حقاره
وما جايباك مره الجابتك بس غارة
وقرناك كثير ونفسك ابيت وقاره
خبرك هادا ما دايرلو دق نقاره

قام واحد من اعوان شيخ العرب اسمه علي ووجه الكلام لي طه وقال :
قبلك في اللجج يا طه راحو الهدو
تتجاسر علي شيخ العرب بتهدو
زولكم ماعقل يا كبار كما تهدو
بعنادوا الفريق خايف يسبب هدو

هنا الجو المجلس توتر وقام طه قال
انا المالح الكارب خريفي وصيفي
المثلك تبيع ما بطول فوق قيفي
كما الليله في بيتي وبعدك ضيفي
في الشي السمعتو برد عليك بي سيفي

هنا قال شيخ العرب
كفي يا بطاحين فيكم اتغشينا
كرمكم جانا طامح رخصه اتعشينا
بعد الشى السمعنا كان ما مشينا
خايف في اجتماعنا تقع وقايعاً شينه
في وداعة الله عقب بيناتنا ما في علاقه
وات يا طه اتشفيت شبعت شلاقه
عمرت الشر سعيت دليته بي معلاقه
نحن وانتو بعد الليله يوم نتلاقه

قام عبد الله عاوز يرضي شيخ العرب ود دكين فقال
من ولدك زعل كل البلد بتكاورو
ارحكم بيتنا بيتو ونحن زولنا نداورو
نتدابر نشوف نحزم جمعنا نشاورو

رد عليه شيخ العرب
ضيف الغابه حالف ده الفريق ما أجاورو

قام عبدالله قال
سمح ارجانا يمكن طه نحنا نجبروا

رد عليه شيخ العرب
الزول في الرقاد شقو البريحو بخبرو
والزول البليد بي ايدو يحفر قبرو
عاد بنسوي عوسنا وطه يلزم صبروا

رد طه علي شيخ العرب و قال
سوي الدايره وكتر الكلام خليهو
والشر القصدتو معاي ابقي عليهو
طير اصل السما حتي القمر دليهو
يوم نتلاقه كل واحد بعرف الليهو
[/b]


عدل سابقا من قبل ود شندي في الإثنين سبتمبر 27, 2010 7:37 am عدل 3 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
ود شندي

avatar

عدد المساهمات : 16
تاريخ التسجيل : 29/06/2010
العمر : 29

مُساهمةموضوع: رد: قصة طه و وددكين   الإثنين سبتمبر 27, 2010 6:47 am

هنا خرج شيخ العرب ود دكين وعيونه يقدح منها الشرار وكبر الشر فى نفوس الفريقين . وقام طه جارى فى ظهر شيخ العرب .. قام واحد من البطاحين اسمه احمد مسك طه وقال : اقيف يا طه عندى نصيحة ليك ابداها
العقدة الصعبة العاقل بيتعداها
الشكرية كتره نحنا ما نالداها
انا عندى العرب اخير نفدها
رد عليه طه : ده راى السديد يا احمد تراك بى فكرك
روح لى ود دكين وريهو يسمع شكرك
يديك مال كتير وقبيلتو ترفع ذكرك
تصبح عمدة فوق روسينا تخلف حكرك
قام رد على طه عبدالله فقال :
ليه احمد تهينوا نصيحتوا ما ضاراك
ماحق النقص وانت بتعرفوا براك
وكت بتسوى عوسك وما بتشوف بى وراك
نشاور ريا ممكن ريا ما دايراك
رد طه وقال :
صدق القالوا خربانه البلد بكباره
ديك ريا أسألوها واعرفوا خباره
من غير السفر ما عندى تانى دباره
نحنا وانتو بالحالة دى ما بنتباره
احمد : يا طه المصاعب للقبيلة تقودا
مسافر وين مخلى النار بوراك موقوده
طه : انا السمتان جليس الردفولا عقوده
حد السيف بقطع عقدتو المعقودة
ماولعت ناراً انتو تقعو فيها
شن دايرين براى وانا نارى مدفيها
احلف ليك يمين دى الحلة متقفيها
باكر من صباحى قبل يحس الفيها
عبدالله : نحن كبار اخيرلك ترضى بعرفتنا
مع الشكرية احسن نشترى الفتنا
ندى ود دكين ريا ونكتل الفتنا
مامن خوف ملاقات الرجال حرفتنا
طه : من الفيها مابزح ان تزحزح مره
وإن حين نعود وان طال زمنا ومره
عيش الدنيا إن كان يحلى وان كان مره
الزين ما بدوم والزول بموت فد مره
عبدالله : وكت صممت ما ترجع وتسمع قولنا
وسفرك ده محال ما بقبلنبو عقولنا
الموت ما بنخافو الخوف يمين مو هولنا
بنعاين بعيد بنخاف بهادل عولنا
الشكرية بسيوفنا صغيرنا معتق
مابنابا القتال ونقول جرحنا اتفتق
مرحبتين حباب الشر محل ما بتق
تنقد الرهيفه إن شاءالله ما تتلتق
طه : الشكريه غوش واكتر علينا حساب
وضيف ليهم يمين ما بتربطو الأنساب
أنا لغارتم حسب الف حساب
لو تتعدوا رأى يمين عذابكم ساب
بجيكم حمد ومعاهو الرجال تابعاهو
قولولو طه طفش وريا معاهو
كيف نرضى السفيه الأدبو ما برعاه
يرفض طليك إت ونحن كيف نسعاهوا
ابقو قصادى وحدى القبيلة معايد
عقبال من رجع فوق الخسائر عايد
وان كان دارنى انا ما بترجع جموع الزايد
وإن حصلنى قط ما أظن يعود بفايد
عبدالله : ما بقيف ود دكين واصل السرج ملعوق
وفى دربك بسوق واياك يا طه ملحوق
وات صنديد تصد الميه ما ممحوق
بنخاف كترتم ويد الرجال بتحوق
طه : ليه خايفين على والدنيا عيشة مخاطر
الواجب نسوى ونرجى ستر الساتر
فى وداعة الكريم الليلة فى نيتى خاطر
يادار ريا ماكان الفراق بالخاطر
كفاية مع السلامة انتهيت خلاص
غير الشورة دى مالينا تانى خلاص
فى نيتى حرير الدكب القصاص
ما بخاف وددكين ان جانى بالرصاص
قام مارق منهم وساق بت عمه ماشى بيها طبعاً لأرض الجعليين ماشى للمك نمر يوريه على ان نسيبك دا جاى يقلع منى بت عمى . قام مارق بعدين احمد قال لعبدالله :عم عبدالله خبرك هدا شتين فاجع
كيف بنطاوعه من بيناتنا يطفش ناجع
عبدالله : سمعت كلامو من الفيها ما متراجع
وفى الشئ الشايفو غط بهينة ما بيعود راجع
أحمد : نركب نلحقو نخليهو يمشى براهو؟
عبدالله : شورة القال اخير ما نلحقو ونبراهو
العاقل بحسب للتقيل تافراهو
بنفكر على القدامو والبوراهو
احمد فوق السقوط قط فى ظنى ما يخلوهو
كيف موقفنا ساعة يلحقو يكتلوهو
عبدالله : إن وقع القدر مابتقدروا تصدوه
ودا كتر الكلام اسع اخير تخلوه
( بعدين آ ... آ ... آ ساق بت عمه وفى الخلا كان بحجى فيها وقال ليها )
طه : درقى يكركب كيم
رُكبى يشيل بر عمه
أصلى بطرز امه
منى تحود الأمه
جمل يكسر الغربه ,, سيف يحل من مجربه
قلبى سنين تربه ،، ما بتدمانى الغربة
يا ريا الحلم ما شفتى كيف اتهول
واتفسر براهو وبالشين علينا اتأول
داخل راسى فكراً منو ما بتحول
بكتلو وددكين إن كان قرب أو طول
ريا : أسود وددكين باسمو ماتحجينا
هو الفرقنا قمنا من البلد هجينا
عقب فى دار جعل تانى الخراب ما بجينا
ما بسوى الرماد المك نمر بحجينا
ريا : ماك شايف الدرب
طه : ماشيهو بكرعى تلات أيام وضحى وكان معاى سعية
كيف يلحقنا زول شندى ومعاه معيه
قبيلة دار جعل محميه فيها اسودا
تقدل بالكرام ديمه وحاقدا حسودا
راس المك نمر كل القبيلة اسودا
ركازة القبائل فى السنين السودا
بكره نجيه وسيفاً يجيك بولادو
العز والكرم من الكبار تيلادو
ما اظن وددكين بشينة يوطا بلادو
ما خد بت اخوه شمة ام أولادو
إن ودعتك المك ما بخاف المتلو
اهون من شراب المويه عندى اكتلو
وارجع للبطاحين تانى وراينا نفتلو
والشكرية تقيف غير حرب مابتلو
يا ريا البطاحين اصبحت محقورة
على الشكرية دايماً سارحتم مدفورة
ما بتقال عز وتعيد مكان وقوره
إلا الغاره وتقضى صقوره
ريا : فى داب الشديدة ابقالنا قوم دربنا
بوصفك دحين من شندى نحن قربنا
ما بنفتق عشنا بالفتقة دى نفرقنا
ما بنوم الرجال امكن يمسكوا دربنا
طه : يسمع حركة
ريا : يا هم ناسنا خمسة عقب رجال وينو
ما بتشوف وددكين برز براهو هوينو
طه : الشئ البين نحن سعينا لتهويلو
وضايقنا الصعج ما أظنو يعود لعويلو
الناس المعاهو عرب صعيد يا ريا
ما أولاد عم ديل والله ما شكرية
معروفين تمام فى كل بلد وجريه
كان حفرولو ولقوه شجرة ضريه
عارفين وددكين ما بهم بخيل وجمال
بكتلنى وبسوقك وهم بسوقوا المال
وبكتلو وددكين ودى الطانها فى فكرى
بتشوفى الفضائح الما بجيك من شكرى
الشكرية فرسان ومستحقين شكرى
دا الصح قلتو ليك أنا لا بخاف لا مكرى
ريا : يا طه استعد الناس عنونا عديل
طه : وين شفتى القطاع بتسوى هم قديل
بضاير العوقة اخوك المابهم من ديل
براك بتشوفى يا ما اشبعهم من بهديل
( هنا شيخ العرب جاء وقف جمبهم قال لى طه
شيخ العرب : أتعبت الزمل حفيت وراك مستبقا
احسن ليك تفوت ريا وتحل الرفقا
طه : كان كل القبائل جات على منطبقا
أفوت من ريا يا شيخ العرب ما بتبقا
شيخ العرب : البلاوى القبائل ما بسوى سواتك
خربت قبيلتك يا طه وين داواتك
تانى بحد جريك البشهدنو اخواتك
فارقت الثبات فارق درب ابواتك
ابواتك تيوباً (تلوب) كانوا باعن طايل
ايدن للرقاب تحجا وتعدل المايل
سيف باعك كراعك ما بتخاف قول قايل
أفو يا ودحسين فيك السؤال مو خايل
أبقى لى نسيب أحجاك وآمل روعك
وقول الدايروا فى الملك اجيك فى طوعك
من هذا الغرور ياولدى اولى رجوعك
طه : يا شيخ العرب جربت لحسة كوعك
كل ما أوغرك فى الشينة اراك تتقدم
اتعرميت خلاص انا صبرى حسمه اتهدم
اصلو البينا ما بتنفك من غير دم
الكاينة التكون بوراك ما فى ندم
(واحد جاى مع شيخ العرب – عربى- قال لى طه :
العربى : أصلو الخملا ما بسمع نصيحة الهادى
اول خفنا ليك من البهادى الهادى
يا طه البهدى الما بضرب الوادى
بمشو على الرجال ويقرن مقبل فاضى
طه : هسه وصلت الميس دحين حديد يلاقى حديد
ينبرش الطرور ويثبت الصنديد
خليه المضى لاقى البجيك جديد
(واحد برضو مع شيخ العرب قال لى طه)
عربى آخر : ما بتشيل قدر يا طه انت عميت
وفى المروق وقعت عترت ما سميت
من الجاى قضيت وبقيت خلاص زول ميت
فى تركتك كفاى انا بركب اب سوميت
ابو سوميته ده الجمل بتاع طه )
طه :
الداير الغني يعمل حساب لي فقرو
كعب الضله كيف المتلي انته تحقرو ؟؟؟
ابسوميته خلي الليله سيدكم اعقرو
وين تاني الملاج وكتين يتلب صقرو
ود دكين :
لم باقي الكلام يا طه بهمك سرب
جييييييييتك استعد
طه :
مرحب حبابك اقرب
من قومه الجهل انا لي لقاك مدرب
يا شيخ العرب الليله نجمك غرب
وهنا تقع معركه عظيمه بين الفارسين وبعد ساعه من القتال يسقط شيخ العرب ود دكين ميتا بين يدي طه :
طه :
تري شيخ العرب قبض الربح من تجرو
اتوسد تقيله انشاء الله ثابت اجرو
( ثم يلتفت الي عمر ) :
وانتو الشوره كيف .. عندي الزمل وبحجرو
صنقعو .. ده السماء .. بطيرو ولا بتجرو ؟؟؟
عمر لي أحمد وقد طار قلبه :
ابرز يا عمر الروح في ايد الخالق
بتجابه الضرب في الدرقه ساسك غالق
أحمد لي عمر :
عان ده الخشيم دايما تنط متشالق
ما تنزل عليه ... مالك ات ماك بالغ
طه :
ضربي صعيب علي وصف البوصف عازر
في غارب التلوب انا نايبي دايما غارز
اسمعو يا طمش كان ما يجيني مبارز
واحد منكم بضرب طرف ما فارز
تري ابسوميته اركب يا طفلول سافرته
قبيل وقت الكلام زي الاسد طفرته
مال دمك بهت متل القول جفرته
عمر وقد ارتعدت فرائصه:
من القلتو ليك انا عديييييل تبت واستغفرته

طه :
انا علي حلف ان كان بقيتو سريه
منكم انتهي قبال تجي العصريه
جيتكم استعدوا تاني ما فيش ريه
هجم عليهم طه لكن الاتنين قامو جارين يتحامو بي ريا وقالوا بي صوت واحد :
هاديل السيوف واقعين وراك يا ريا
طه :
يا خضره المفرهده فوق جروفه نديه
علي الواقع وراك انا كيف اشيل ايديه
حتي كان كتلني عافي ليه الديه
دمي ومالي هيلك واقبليه هديه
ريا :
رجال التابه ... انتو الستره تب ما فالكم
اتامنتوا قوموا وامشوا سوقوا جمالكم
حت مال ود دكين سوقوهو يتبع مالكم
نمشي في حالنا نحن وانتوا تمشوا في حالكم
طه :
زايله رقد ود دكين اسد القبيله الراعي
كان ما ضايقني هو .. ما كت قطعتو ضراعي
ريا :
تتاسف ليه ليه كان دار يجز براعي
والنعلات حرام ما تضوقه تاني كراعي

ده كان القسم الاقسمتو ريا لو ود دكين قتل طه وسباها
طه :
موت المتلو نقصان للعرب في الجمله
كان راس الجرارق وهو البقود الحمله
اطرا فعايلو جفني يجف بعد ما يمله
كما شويييه كان داير يعمل العمله
وتوجها الي شندي حيث المك نمر .. يصل طه الى شندي و يدخل على المك نمر وحواليه اركان حكمه و وزرائه :
طه :
التلب اللزوم مدخور يشيل العايلة
يقدل بى مهل فوقه الحمولة الهايلة
اياك مرق القبايل فيك نسند المايلة
فراج كربة الهم اب قبايلا جايلة
عامر جمعكم انشاء الله ما ينفض
ما جابنى مال ما بدور دهب لا فضة
بدور المك نمر سيد النحاس الجض
جيتو على حملة غيرو ما بتنجض
المك نمر :
تقضى كان بقدرها
طه :
انت اللزوم ماك حاشى
الاك زي حزمتى تشيلها تقدل ماشى
التقيان تفشو والضعيف بتراشى
ما داب قبيلتك انحن بيك نفاشى
جيت يا مك واملى فيك تكشف همى
فى الاول وداعتك و فى حماك بت عمى
وقتين تقبلها تكون شلت تلتين همى
و التلت الاخير تحجانى تحقن دمى
بت عمى اب كبس ما كان ابوها فقير
ابوي قبالو مات وربانى كنت صغير
وكت لحق عش وراهو مانى حقير
اصد الغار على جاري و لى عروضى اغير
المك نمر :
مالك هسى شن جاك
طه :
جاتنى جنية حربة ربى ما بى خاطري ما بالنية
المك نمر :
كتلت منو وجريت
اها دي المابيها لكن خفت الورانية
الموت ما بخافو الخوف يمين مو هولى
الشئ البخافو بخاف بهادل عولى
كان الناس الوراي براي يسعو لى
فى راس لبكتلتو اقيف يمين لى حولى

كان هم برضو بى تارهم و ياخدو الهيلتى ( يقصد روحه )
ما كنت التجيت ضاقت على مهيلتى
يامك ناسى قلة بخاف يخربو قبيلتى
بى جعل احتميت فوقك سندت تقيلتى

الشكرية تقيو و ى الجوار ما براعو
حمد ود دكين فى راسى خت كراعو
سمع بى سفري قاصد شندي قام بسراعو
قاطع دربى يخرت ريا قال بى ضراعو
جيت من اهلى قاصدك ما بقبل تار
انكشف الامر دحين براك اختار
يا اما تبقى بينى والبخافو ستار
ولا تفتلنى انت نسيبو و تاخد التار

اياك عز القبايل و الكرم فيك طبعه
و جارك ما بهم ان كان مسوي السبعة
ان كان اجلى تم اخد قصاصى التبعه
و الياكلو الاسد اخير لو من الضبعة
يلتفت المك نمر للجعليين من حوله و يقول :
مطارق جعل انتو الكلام سامعنو
قولو دحين رايكم وفكركم الشارعنو
يهب احد الجعليين واقفا :
كان ضيفنا ما نحجاه و ندافع عنو
نرمى سيوفنا ليه تانى الحصان ساعينو
قديم يا مك ديارنا مرتع الامال
و شعبة الكون وركازة الزمان ان مال
صغيرنا ان جال يضاير العوق يمين وشمال
بدمانا النزيل نحجاه قبل المال
اديهو الامان يقدل و يلقى مناهو
البقى فوق امان المك منو البدناهو
كل اسم جعلى من اعلاهو لى ادناهو
محال يبعد والمك نمر ادناهو
المك نمر :
انتو كبارنا شورتكم جمعنا بتعمرو
مارستو الدهر ضايقين حناضلو و تمرو
غاية الحى فناه الموت نهاية امرو
لكن بى وراه ذكرو بصبح عمرو

اياها الضامرة وعليها كنت مصمم
ما اتعداها رايكم جايي ليها متمم
سار فى امانى طه بالزمام متزمم
و ادوهو هدومى و بعمامتى اليكون متعمعم
ارتع فى امانى انا البفش البتقو
يلزمنى اليمين ان ولدي جاك ما اعتقو
بالمال الشرط عازم اباك ينرتقو
وان كان قالو لا عقبا نوسع فتقو
نبه بالامان فوق النحاس بشربو
عشان يسمعو كل الناس البعاد والقربو
عقب البدنى طه يمين عقابو نخربو
انا المك نمر كبريت يحرق الجربو
طه :
نمرا يركب الكيك البطل يتحرن
نمرا يقلب العوق ام صفوفا جرن
خلوات صدرو فى علوم الحروب كم قرن
سيفو بينسف الدرع الحديدو مقرن

ما نمر الشدر حاضن فروعو مقيل
ده النمر البضاير الصف محل ما يميل
كل ما اقول شكر القاهو فيهو قليل
كفو بيخجل العين السحابها منيل

قبيلة المك قبيلة ما بتختا اصولها
العشمان يعيش فوق ضلها ومحصولها
بالشين البدورها بعيد عليهو وصولها
فروعها سيوفها ومطارق جعل فى اصولها
عرمان جدكم والنسبة عباسية
و اعياد فضلكم لليلة ما منسية
هاهى الدنيا حية بى فخركم مكسية
نزيلكم ما بهم ان سوى الاف سيئة
مين سابق العرب فى اصلها و فخوذة
مثبوتة الرجالة وعنكم ماخوذة
صغيركم يدخل الحارة ام لبوس يخوضها
مجرب من قديم سيفكم بوابر الخودة


(واحد حاجب كان قاعد جم نمر قال)
الحاجب: نبه بالامان فرسان فازن وهزت
دقين النحاس فوق الرجال انعزت
عروس الكُجرة فرحانه وطرب اهتزت
عرمان عزُّ لله قبيله بيك اعتزت
المك: وصلو طه للبيت المخصص ليه
واحفظ كل موجودو وجميع ماليه
خدمتك باحسن تقعد معاهو تسليه
فى كل يوم تعيت ناس يغفر عليه
طه: عشمكم
المك: ابدى بنصايحك وبيها أخير انصحنا
واختم بالحماس بالفيها قولىّ نحن

النصيح: خلى عجب النفس الدنيا قيد قصير
وبشرك اصيحو لا تكون دوام متغير
لا يغيرك هوا الضُحى المتغير
كم سبق الاجل خلا الامل متحير
بينما المك نمر يتداول الحديث مع من حوله دخل عليهم احد الجعليين
مسرعا فقاطع حديثهم قائلا :
الشكرية زاحفة الليلة جات بى عقابا
ختت فى النصاب لى كتالنا مادة رقابا
لقيت يا مك جمال سارحة خربو الغابة
و اندق الزرع لا قصبة لا رقابة


المك نمر :مطير درقة وين فارقت عقلك شرق


الجعلى :انا ود الحروب البى سيوفا مجرق
ادينى الاذن يا مك وسيفى مطرق
اعصر كيكى فوق كوش العريب يتفرق


المك نمر :الخيران كتار ما اظنهم متسابى
وبى كتال قوم جعل ما بفرحو الكسابة
ما بجو ناس كتال الناس معانا نسابة
و البيناتنا لابد يحسبولا حسابا



يدخل عليهم وفد الشكرية
سلام يا مك دار جعل يا مك نحن رزينا
و بى موت ود دكين كل القبيلة حزينة
محمد بقول بى نسبك اتعزينا
رسل لينا طه قبال تجى تعزينا


المك :
حمد قبيل طه يوم داره جاهو براهو
ما دق الطبول و قبيلته جات تبراهو
السواها طه اكبر على محراهو
راجل خاف جري تجري القبيلة وراهو
ضعيف كاتل حمد فى القوة ماهو كفاهو
بس خانو القدر ساكت اجل وافاهو
الراي السديد شيخ العرب يعفاهو
و الزي ود دكين دم طه ما وافاهو
مالك يا شيخ العرب لى راسك حانى ؟

شيخ العرب :
الفى صدري شيتا حايصة ما رايحانى
راضى الحال على كاتل نسيبك حانى
الظانينو كان تقتل اسم بطحانى

المك نمر :
الظالم لى من ما حملت عزاهو
و حقك تاخدو تام وقتين تقيف فى جزاهو
البعفو المسئ عند الله بلقى جزاهو


محال محال نرجع من غير طه ولا نكتلو
نرجع لى قبيلته كتالنا ما بتثبت لو


المك نمر موجها حديثه لوفد الشكرية :

قول ليهم طه نزيلنا و المك جارو
اصبح فى امان الما بهمل جارو
شن جاكم جديد كنتو الفضل تجارو
ما تعفوه طه فى دربه ليه تتجارو



زعيم الوفد :
فى زولنا الكتل هانت مسافته و قربت
الكاتل كان بخلوه طه ما كان كربت
غير نطلب اذن زاملتنا كانت شربت
كان دي الحالة بدري الدنيا كانت خربت
(يتبع)[b]


عدل سابقا من قبل ود شندي في الإثنين سبتمبر 27, 2010 7:37 am عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
ود شندي

avatar

عدد المساهمات : 16
تاريخ التسجيل : 29/06/2010
العمر : 29

مُساهمةموضوع: رد: قصة طه و وددكين   الإثنين سبتمبر 27, 2010 7:33 am

طه:

يا مك فداك وديني
ما تتكتلو سلمني النسد فوق ديََنْي
لي وطني الخراب بي سببي ما برضيني
حقن دم العرب بي دمي غره عيني

المك :

ما تحسب حساب وكتين بقيت في اماني
وتسليمك محال في الدنيا حي عرماني
الجن و الانس كان تجي مداهماني
دونك دمي يدفق ودم قيماني

ها ناس بيناتنا النسب إن جيتو بالودية
في دم الكتيل راضين نخت الدية
وكان قلتو لا ودرتو الكلام إيدية
ندق التور ضحى و نجرب الزندية

الشكري :

دا الشين البخلي الزول يعضي ايديهو
المك إن خِتا منو البقوم يهديهو
كاتل ود دكين لا تكتلو لا تديهو
الشر اقصرو الزول اخير عديهو

المك :

بعد الهد عقب بيناتنا حد السيف
وإن ختيتو دي انا منكم ما بقيف
راعيكم جديد ما برعى في العلَيف
عتبات الصرات اهونلو من القيف

جيتو تهددونا الرسلوكم شربو
بكرة الديش بجيكم اثبتو واحملو حربو
شاردكم ما بخلي بلحق عقابكم اخربو

النازله البحر عدوها بس معقورة

الشكري :

الشكرية ظاهرة قبيلة مي محقورة
إن دورتوها ياما تلاقو فيها صقورة
قبال يثبت الفارس يختفو البورة

المك :

بقيتو رجال وتغيرو تصلو لي عين وكري
يا قراضة القبايل يا النص جمعكم مكري
قول لي الرسلكم ما تجيني عقبال شكري
البيناتنا خربت ارجو عاد عوس فكري

الشكري :

قبيل حامدين فعايلك وبإنشراح جايينك
ليه بتهينا يا مك كتيرة دي منك
وكت ابعدتنا و طه بقى ليك و منك
إن زلتنا و إن جليتنا ما ناطينك

ما فينا الإضينا ومانا قِلة كتار
نصلي الحارة نحنا نوجب البتّار
صغيرنا إن جال يعجبك للصفوف بعتار
كبيرنا يفرتق الحافلة و يجيب التار

سمعناها عاد و الفارقا ماها ملاقية
عرفناها المعاك نرجع و تبقى الباقية

المك :

هوي يا عرب احسن تراعو آدآبكم
واسوه الكلام قبال اواسي رقابكم
ما عندي الإضينا الاصلو معدود دابكم
فد جعلي إن ركب حالو بخربو عقابكم

فلاحت العربي داك سفروقو ويجلب كلبو
يا يربط درب ويرجى الإضينا يسلبو
الهيلكم حقيقة وفيها ما بتنغلبو
فالحين في القنيص ترعو و تعرفو تحلبو

رجالة و كرم ديل بيهم إتخصينا
وكت الكوع يحّر نَحْجى العروض و نصينا
هد شامخ الجبال إن دورنا ما بعاصينا
سيوفكم في الحرب بنكسرن بعصينا

كفاكم استريحو من الكلام دا قضينا
والدورتوها إنتو نحنا بيها رضينا
قبل تمتد سداكم تلدو نحنا حضينا
والحَكَم الحسام و السيف يكون قاضينا

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
ود شندي

avatar

عدد المساهمات : 16
تاريخ التسجيل : 29/06/2010
العمر : 29

مُساهمةموضوع: رد: قصة طه و وددكين   الإثنين سبتمبر 27, 2010 7:54 am

زوجة المك نمر هي في الحقيقة بنت اخ شيخ العرب ود دكين (يعني في الحسبة عمها) فقامت تمّنْح
وترثي فوقو


زوجة المك شمة :

غرار العبوس الليلة دار دولابا
يا خريف البطانة و مرتع الجلابة
بِتعَقّر الركوبة وتنحر الحلابة
كم قشيت دموع وجّعا و نتعتا غلابة

عمي العم سيل إيداهو روى الماحل
تساب بحر المحيط الما بضمو الساحل
يا حليل ود دكين مونة المقيم و الراحل
سند الهاكعة نشال التقيل الواحل

صعيب فقدك عليّ وشوية فيكا بكاي
انوح لامن اروح عيني انقطع وكّايا
طالبني الدهر قاصدلو فيّا نكاية
بعد النكبة دي باديلو تاني حكاية

وا وجعي الشديد انا جمري زاد في وقيدو
ابوي جا وداير يستاتير في فقيدو
الديش كلو راسو خوي وعقيدو
طه المك حماه والشر صِعِبْ ترقيدو

ناقت للمروق وانا روحي جات متطاردة
كعب الحال خلاااااس و العُقدة مي مجاردة
الشكرية امس لحقوها حاره و باردة
خلو المك زِعل حالف يعقر الواردة

ديل ناس وجعا كان عملو زي ما يعملو
مالو المك لو فوت كلاموم حِمِلو
قالو عطاشة وُرّاد بينزلو يملو
وان انسلا سيف تاني القبيلتين كملو

بعضي مجافي بعضي وليه اضحي ميلادي
وانا ان صاد امان الطار في بيت ايلادي
أكان المك يفوز افقد ابوي و اولادي
والتانيا ان بقت افقد ابو اولادي

وا وجعي الشديد يا همومي وين تنجمعي
طشش شوفي فارق سمعي
طال اليوم بكاك يا عيوني جود يا همعي
واصبح جفني جاف و الوَحّا حرقت دمعي

يا بت صافيات لي ود النعيسان روحي (ود النعيسان احد الدُهاة و الاذكياء بين الجعليين وهي طلبتهو للمشوره)
ماتجي دوني فاضلي اخنق روحي
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
قصة طه و وددكين
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات بيت الضل الثقافية  :: المنتدبات العامة :: قسم الحوار العام-
انتقل الى: