منتديات بيت الضل الثقافية

منتدى ثقافي يتبع لجمعية بيت الضل الثقافية ( معاَ من أجل ممارسة ثقافية سليمة )
 
الرئيسيةالرئيسية  البوابةالبوابة  اليوميةاليومية  س .و .جس .و .ج  بحـثبحـث  الأعضاءالأعضاء  المجموعاتالمجموعات  التسجيلالتسجيل  دخول  
بحـث
 
 

نتائج البحث
 
Rechercher بحث متقدم
المواضيع الأخيرة
» قصة تتطفل الميكانيكي على قسم مدنية
الإثنين مارس 18, 2013 1:49 pm من طرف Velver

»  فرحة رجوع
الخميس أغسطس 09, 2012 9:19 am من طرف matadoor1991

» قصه بدون عنوان
الثلاثاء أبريل 24, 2012 4:40 pm من طرف محمد عبد الله عباس (حنفي)

» **بحر العشق**
الثلاثاء أبريل 24, 2012 3:59 pm من طرف محمد عبد الله عباس (حنفي)

» ناامت (كااملة)
السبت أبريل 07, 2012 5:30 am من طرف محمد عبد الله عباس (حنفي)

» ماداير عرس
الأربعاء نوفمبر 23, 2011 3:25 am من طرف الدمنهوري

» حكم العقل
الجمعة سبتمبر 23, 2011 2:58 am من طرف الجنرال

» بيت شعر لمن تهديه
الأربعاء مايو 04, 2011 3:19 am من طرف الدمنهوري

» ***ناامت***
الإثنين مايو 02, 2011 12:22 pm من طرف بكري الامين

ازرار التصفُّح
 البوابة
 الرئيسية
 قائمة الاعضاء
 البيانات الشخصية
 س .و .ج
 بحـث
منتدى
التبادل الاعلاني
احداث منتدى مجاني
المتواجدون الآن ؟
ككل هناك 1 عُضو حالياً في هذا المنتدى :: 0 عضو مُسجل, 0 عُضو مُختفي و 1 زائر

لا أحد

أكبر عدد للأعضاء المتواجدين في هذا المنتدى في نفس الوقت كان 17 بتاريخ السبت أغسطس 31, 2013 12:35 pm

شاطر | 
 

 ود كبيـــــــــــــــــــــــــر

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
ود كبير
شاعر مبدع
شاعر مبدع
avatar

عدد المساهمات : 8
تاريخ التسجيل : 06/04/2010
العمر : 30
الموقع : جامعه السودان الجناح الغربي

مُساهمةموضوع: ود كبيـــــــــــــــــــــــــر   الخميس يونيو 17, 2010 12:12 am

وخابرك ود كبير في الحاره إت قدامي
في القول والنضم ياكا البكون الهامي
وحدك يا الاصم قادر على الجامي
حبك في الضلوع مكتوب علي الزامي
* * * * * *
إذنك يا الكبير داير اجرلك نمه
امدح فيك زين وسط الحشود واللمه
اقعد بالقصد في نار هواك انجمه
اتقهوج معاك ريحه البخور تنشمه
* * * * * *
ويا ود كبير اسد البراري تهابك
وفي ساعه الزئير الكل بخاف من نابك
ما بتشبه بشر غير إلا جدي الجابك
إذنك يا الكبير داير اجيك فوق غابك
* * * * * *
وإت يا الكبير همباتي بخبر صيو
قناص للنجيض ما عندو شغله بنيو
مغمول الجراح بداوي إت بكيو
ولدك دار يطيب وكتير معاهو الزيو
* * * * * *
ولدك ود كبير والله يمين في حيره
من فات الاهل خلا البلد و الجيره
مغيوز بالفراق كاتلاهو والله الغيره
وإن قلت الاصم قاصدك يمين في السيره
* * * * * *
وفارقت البلد إلا النفوس هي قريبه
لا بتحمل جفا لا حاجه تبدو مريبه
بتنسم هواك والشوق لهيبو ضريبه
شايفك في النجوم والله يا بوي ما غريبه
* * * * * *
وما برتاح يا بوي لامن تشوفك عيني
واحكيلك كمان البين حبيبي وبيني
غدرتنا الظروف ما عرفتو وين لا ويني
إلا خلاص بجيك وديك يا بوي حق ديني
* * * * * *
وتربايه الشرق لكن ابوي غرابي
هواري الاصل فوق الاصول جلابي
فكاك الكرب عاوزك تفك كرابي
من زولاً حبيب يا بوي صبح ضرابي
* * * * * *
وولدك ود كبير بينات ايديك اتربا
قصاص الاتر ساعه عدو يتخبا
بقلع بالنهار في ليلو ما بدبا
اسداً زي ابو والله يمين ما سبه
* * * * * *
وعفوك يا ابوي قصرت فيك مو ناكر
زاكرك يا ابوي طول الوقت ليك فاكر
كملت العليك يا بوي ليك انا شاكر
ستفت الشنط من شوقي جايك باكر
* * * * * *
وقصد البلد قضروف سعد بالوافر
اتنين في الوقت نقر المعنف وعافر
ذكرني الحبيب المني باعد ونافر
اديتو الخبر في رساله إني مسافر
* * * * * *
اها وإلا الحال قلب بعد الرساله الوصلت
نغجلت الرويح وكتين مو قالت قبلت
راضيه على الفراق برجاك يمين إن خربت
والخربت معاك في عيني حرم كبرت
* * * * * *
وعقب رفعت راسي لقيتو واصل سوبا
بيت بت الاصول الراكزه ساعه الحوبه
حافظاهو الشرف ملفوف يمين زي توبا
وارثاهو الكرم من كان بتحبى هي دوبا
* * * * * *
واتذكر قبيل قعدتنا فوق الجامعه
زهجانه النفوس فوق التخرج طامعه
ود عبد الفضيل زي النجوم الامعه
لا بحمل بعاد وعيونو سالت دامعه
* * * * * *
وبعد ثواني وقفنا في التفتيش
وفي صف الوقوف ترتيبنا كان الطيش
عنافي الطريق يا ربي اصبح بيش
ولا الراي كبير داير صغارو تهيش
* * * * * *
واتحرك بشيش بعدين سبق اغرانو
إلا اتنين بعاد ذادن لهيب نيرانو
كل ما يجيم خلاص ويكونو تب جيرانو
يجفلو من جديد ويذيدو حر نيرانو
* * * * * *
و فحط في الدروب حرم يمين غربلها
كنتك للحداو والجيره فات سبلها
اشر باليمين والبوري ذاد طبلها
فشه غليلتي دوب لامن يمين دبلها
* * * * * *
وفي الباقير هجع واخدلو وقفه شويه
سل الروح عقب دبل عليها الكيه
مهما الزول يفوت حتما بتني الجيه
راجعلك عريس في شمالي ماسك ريه
* * * * * *
وريه معاي دوام ساعه القنيص والحاره
ركابه سروج في الضربه واجعه وضاره
ريه مع النشاف سحب الخريف الداره
ريه كفاي وبس في وشي دايما ساره
* * * * * *
وريه مع الدماس صوت البلوم القوقا
نضامه سكات قولا الهديل والنوبه
ريه مع البنات جدي المراح الدوبه
ريه وشن اقول ما دام بتلبس توبا
* * * * * *
وبانت لي هناك صوره جياد واوصافه
كبريها العلى غازل عيوني وشافه
البان في اليمين بشبه قوام اسلافه
ويا المصنع بخاف منك تكون عرافه
* * * * * *
وفتناك دون نفس إلا الظروف حكامه
لو ما بس جبر وارواحنا دايره مرامه
ما بنخطاك شبر لامن تشيلنا قيامه
لكن دون قصد راحلين وشلنا ملامه
* * * * * *
وخشينا المسيد طفنا القباب ومسيده
ركعنا العصير وسالت سيدي وسيدا
في العيد القريب المس خديده وجيده
ما دام بالحلال بغمس دماي في وريده
* * * * * *
وبتذكرر زمان ساعه الشمس تنحره
نتجارى ونخاف فوق الهجير نتزرا
إلا براي بقيف شان ريه ما تنشره
بستحمل وقوف كرعي ما بتنكرى
* * * * * *





وسرحان فيك دوام يا ريه كيف امسيتي
ساعه من الفراق معصور وطالع زيتي
نمه ونمتين يا زوله إن غنيتي
اعفيلي إن مشيت قاصد هناك ناس بيتي
* * * * * *
وردت ود كبير مسخت علي الحله
مرضانه القلوب زود علي العله
الريد للبريد ما فيهو ابداً زله
يا عشقي الوحيد قربت اجن بس إلا
* * * * * *
و الجن لي براي يا ريه تسلمي انتي
من نار او فراق لو حتى كانت سنتي
شمسك دون ميعاد هلت معاي وبنتي
ريه وراي دحين اوعاك رخيتي ولنتي
* * * * * *
ريه وود كبير إلا القبور تفرقنا
والسفر إن كتر منك محال يفرقنا
واصل للاهل شوقم بحر شارقنا
حيه وراك موت بعدك بدور يحرقنا
* * * * * *
وبعد فتنا المسيد بربع ساعه اظنو
في الكاملين لقيت جديا بقارب سنو
خدره مع السماح خلت عيوني يجنو
شبهك يا ام خدود ما لقينا بعدك منو
* * * * * *
وجنه وشامه فوق خدا اليمين كاتلاني
والديس المهضلم بيهو كم مارضاني
البرق الشلع من سنها وخلاني
اردي على الحفير والمويه جات وارداني
* * * * * *
وميرود يا نزار من فت زولتي مودر
وقلبي مع البنات لغير هواها مغدر
في عز النسيم قلقان وحالي مكدر
سبعه ايام صح بركب اجيها مبدر
* * * * * *
وبدري فلمنا بادي وزي تقول امريكي
شيتاً بنشرح وشيتاً تخبرو عينيكي
كل ما اشوف بطلنا وجمبو زولتو هديكي
بتلفت دوام في شمالي تب حاريكي
* * * * * *
وفي الشباك تكيت راسي وغمت عيوني
اصبعي في الخشيم عضيتو جد بسنوني
عقلي يودي يود ويجيب دوام في ظنوني
كيفن حالو عاد خايف يجن بجنوني
* * * * * *
وراسي يميل شمال مرات يمين في النومه
وفي الهلاليه جيت وطريته تاني القومه
لفيته بعني تنيته فيها الحومه

وإن طال العمر ساكن نويتلك قومه
* * * * * *
وقبال امشي منها كان طريتلي بنيه
فاهم راسه ميها اللينه خدره ونيه
مزروعه الجروف الشايله لسه وحيه
ناوي اضوق ثماره المافي ابداً زيه
* * * * * *
واسمع صوت رنين زي نغمه الموبايل
محبوبي اتصل انا كنت ظاني وقايل
إلا الحظ معاكس وبختي دايماً مايل
مازن في مسج قال لي عملت عمايل
* * * * * *
وفت بلد هواي وانا ما بدور اختاها
إلا ظروفي قاسيه وكان عيني تبراها
حولت ود كبير زي ما نست انساها
إلا انساها كيف وانا كل نفس بطراها
* * * * * *
والزول إن اباك في عيونو تب ما بتعلى
ومهما تكون جميل في نظرو جد ما بتحلى
حد لو كنت حبيب بي نارو تحرق وتصلى
أي جرح بطيب وجروحو عاد كيف تبرى
* * * * * *
وانساها المثل قال البحبك حبو
والبختاك يوم رافع روساً غبو
الببدا العوج بالسمحه هينو وسبو
وإن عاود حبيب امسك روسو وجبو
* * * * * *
واتذكرت جاد وكتوفنا تب اتساون
وكان مصعب شهود قت ليهو لا تتهاون
اها التلميذ نجض وجراحو زمن اداون
الايد والكراع ما سمعن يوم اتخاون
* * * * * *
وإن حر الوطيس ياني البدق صقريه
جزاز الرقاب ما بتلفت لي ميه
الواقفين معاي كاتلين اسود بي نيه
والواقفين هناك ما تحرو فيهم ديه
* * * * * *
وماني الهردبيس النفسو هشه ولين
فارس في النزال بختا الخموم الهين
اخواتي البنات خبرات حرابن وصين
وصوت الجيم سري والدوشكه واضح وبين
* * * * * *
وبينا فرق كبير فرق المشير والرايد
قبلك في الصفوف ريس محنك وقايد
جبتك في التمام حيتني شفتك كايد
اعقل في الدواس والشينه منها حايد
* * * * * *
والليله القصيد بيناتنا سخن نارو
والشيخ والحوار يا جادو ما بتبارو
الشافع إن كبر حتما بكوس لي تارو

زي قول المثل الشيخ بجلدو حوارو
* * * * * *
وجيتك بالتقيل بالدوشكه والجبخانه
والقصطير رطن في الغابه سوا سخانه
شوفتك لي رهاب حرم بقرضك دانه
تنزف للركب ما بتنفعك شفخانه
* * * * * *
وبرضو استاذي جاد ماني البينكر قدرو
حامينا وقسم بلقا السيوف بي سدرو
وماني الجد خسيس بطعن قفاهو بقدرو
في عز الضلام جادو بنكوس لي بدرو
* * * * * *
وفي الحصاحيصا جينا وفوق عبورا البره
هدنا وقف سواقنا تاني وجرا
زي طير الشرك ساعه هبيرتو الفره
قلبي غشاها شوق من شوفتو ليها اتسره
* * * * * *
وسلام آ ناس دحين من رفاعه وغادي
الجود والكرم من فوق ديارم بادي
ود المك حمد دراق سيوف بضاضي
زي سيل ام هبج دغشيه داقش الوادي
* * * * * *


وعوام الدميره الليل بقدف سيلو
تمساح نص بحر ساند قفاهو وحيلو
غطاس الغريق من تحتو شايل شيلو
يا اب رعداً بدق ساعه يضلم ليلو
* * * * * *

_________________
يـا حنيـــــــــــــــــــــن
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
الدمنهوري
المدير العام
المدير العام
avatar

عدد المساهمات : 241
تاريخ التسجيل : 26/01/2010
العمر : 30

مُساهمةموضوع: رد: ود كبيـــــــــــــــــــــــــر   الخميس يونيو 17, 2010 1:52 am


الشاعر المبدع ودكبير
والله الجمتنا وافقتنا القدرة علي التعبير
وجد كبييييييييييييير
كل الود

_________________
يا ضوء قمر طالـــــع فـــــي ليلــــه شتويـــا
يا صوت قماري تنوح بي كل صفاء وحنيا
يا اصفــاء من النيــــــل يـــا لوحــــة فنيـــا
يا حبيبتـــــي يــــا امــــي يا غاليـــة عينيـا
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://batealdool.ahlamontada.com
حفيد الفكي
عضو زهبي
عضو  زهبي
avatar

عدد المساهمات : 201
تاريخ التسجيل : 30/01/2010
العمر : 26
الموقع : الخرطوم الكلاكلة

مُساهمةموضوع: رد: ود كبيـــــــــــــــــــــــــر   الجمعة يونيو 25, 2010 4:48 am

لساااااك ودمطر لامن تزيد فوق قوللك
و لسانا راجين حبة رزاز اوحتى ياخ هطووووللك
ورينا كيف برقك بعدالضلام ورعودك
والجمنا بس بالرد ورينا جد مجهودك

_________________
هل تراني اقود باستهتار ....
اتصل على 00999678..
وحتما سيجاوبك الرد الالي على ان ..
.الرقم الذي طلبته لا يوجد بسجلاتنا

[

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://www.alkuro.com
 
ود كبيـــــــــــــــــــــــــر
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات بيت الضل الثقافية  :: منتديات الكتابات الخاصة :: اعمال اعضاء الجمعيات الاخرى-
انتقل الى: